洪卓立:一个唱故事的人

　　“街边太多人与车，繁华闹市人醉夜”，2022年，广州压轴嘅音乐盛宴中，就有来自阿Ken洪卓立嘅《唱故事的人》广州音乐会。呢场排除万难、成功举行嘅演出，好似一份送俾广州歌迷嘅珍贵礼物，小而精致嘅live house，係阿Ken同大家最close嘅时刻，出道至今有意义嘅曲目，佢都摆晒落去歌单度，同大家一起分享。今期封面人物，Color带大家深入认识下“唱故事”的洪卓立。

　　

　　郭玮/文 受访者提供、陈祉伶/图

 

　　

　　

　　“广州限定”惊喜

　　

　　

　　珠海站嘅演出余温未退，谦虚嘅洪卓立一直认为广州站未必会有工作人员讲嘅咁火爆，觉得肯定係班工作人员氹紧佢。而当佢行出帷幕、踏上舞台嘅瞬间，完全冇心理准备嘅阿Ken，被现场嘅欢呼声，以及齐齐整整嘅“粉丝大家庭”深深感动。此前，因为突如其来嘅各种状况，令到广州呢场音乐会延迟咗成个月，阿Ken就用食嘢嚟填补心中嘅失落，不过为咗keep住最佳状态，又时刻提醒自己不能太放肆。阿Ken话，广州歌迷比较冷静，好耐冇见嘅大家在互动环节都唔算十分踊跃，不过喺今次嘅演出现场，佢都能feel歌迷对佢嘅热情。

　　

　　

　　在广州站的音乐会上，阿Ken把自己出道至今最有意义嘅曲目，都摆晒落去歌单度，呢场show特登加设咗歌词投屏添。《少年游》係佢同大家嘅美好回忆，《你那边好吗？》就似係对全场粉丝的问候，encore时唱《弥敦道》，即时引发全场大合唱……我哋同洪卓立喺后台约见，阿Ken话，自己上台嘅时候兴奋到全身震晒，因为可以见到咁多歌迷捧场，真系太开心了。佢仲坦言，其实自己当晚嘅状态未係最fit，但亦正因为呢个状态，佢呈现咗歌嘅另一种味道，都算係广州站专属惊喜啦。

 

 

 

 

　　

　　用歌声讲故事

　　

　　

　　选择将《唱故事的人》作为今次演出嘅主题，係阿Ken谋划咗好耐嘅事。佢经常收到网友私信，觉得大家嘅故事都好有意思，于是就决定，要用自己嘅歌声将呢啲故事唱翻出嚟。阿Ken平时中意收埋自己，但也明白，向大家表达自己，都係一种抒发情绪嘅方式，所以希望今次嘅演出，係可以帮大家表达情绪嘅一个舞台：无处宣泄嘅emo情绪、唔够勇气讲出嘅表白等，都可以通过一首首歌唱晒出嚟。同时，阿Ken亦想借此传递一个“珍惜”嘅概念，珍惜当下嘅美好，比乜都重要。

 

 

　　尽所能唱好歌　

　　

　　一直被人认为係“偶像派”嘅洪卓立，原来细细个嗰阵，曾经立志要做一个电脑教师：“因为我觉得教电脑嘅老师比较轻松。”后来机缘巧合学咗唱歌，又因为听Eason嘅《Shall We Talk》有感，阿Ken发现原来唱歌可以好爽。入行之后，洪卓立都有曾经因为负面评论而唔开心，但一路成长，佢就慢慢学识将留言分类，多关注大家对自己嘅赞赏，同时亦更多自我反省不足嘅地方。洪卓立坦言，唔敢讲自己为咗“歌手梦”付出过几多努力，Just咁啱自己嘅兴趣就係目前嘅职业，但佢会继续尽自己所能，做更多作品出嚟回馈大家。喺新嘅一年，阿Ken希望所有人都身体健康，呢个祝福简单直接，但真心够晒warm了。