前辈有嘢讲

　　

 

　　洪卓立：心脏要强大

　　为声带复健及健身，进行咗一系列密集训练后，阿ken争取2024年可以还翻之前欠落嘅“债”——出新歌、继续巡演,完成呢啲之后，再试下多啲同新人合作新嘢。2022年底,ken完成巡演广州站之后，因为希望调整状态，其他场次因而搁浅。被人话自己“揸流摊”，甚至话佢自暴自弃，阿ken都会觉得唔开心，不过佢始终觉得，作为一个公众人物，有一个强大嘅心脏好重要:“心态要调整，将人哋嘅批评当作自己进步的动力啦!”前段时间，阿ken有幸同刘德华、梁朝伟两位“影帝”合作《金手指》，因为角色定位需要，用台词窜华仔係每日嘅工作常态，表面嚣张嘅佢其实内心十分紧张。前辈嘅演技实在太charm，阿ken渴求从佢哋身上学多啲嘢，呢段经历对佢嚟讲十分难忘。

　　

 

 

 

　　许靖韵：趁后生多尝试

　　Angela许靖韵前段时间搬屋时，居然搵返出当时参加《创造101》嘅训练服，当初一步步努力向前的回忆返晒嚟。喺Angela珍藏嘅旧物中，除咗呢啲满满嘅成长足迹之外，更多嘅係歌迷俾佢嘅信件：“我一边整理一遍睇，好想回信俾佢哋啊！”身边嘅人一直支持自己，係佢十年成长历程中最大嘅动力！早前有机会去校园活动，见到好多正处于青葱年华嘅学生们，Angela感慨佢哋仲有好多时间同机会，去选择自己嘅未来，尝试更多并放胆追梦。对于Angela嚟讲，2023年过得非常充实，有新作品，又开咗show，去到2024年，佢话会继续“贪心”一啲，开多啲show，出更多作品，带更多欢乐俾大家。

　　

 

 

 

　　泳儿：新仔唔好怕蚀底

　　泳儿今年推出“幸福三部曲”，歌名分别係《同归于尽》《一了百了》《无能 为力》。看似绝望嘅名称，其实都蕴含住拆解人生难题嘅方法。泳儿话，人生冇可能顺风顺水，而佢表示，依家嘅新人好唔容易，因为优秀嘅人十分之多，佢俾新人嘅建议係：“唔好怕蚀底啰，不求一下子爆红，但要有自己嘅风格，咁人哋先容易记得你。”对泳儿嚟讲，2023年都几完美，音乐上俾到大家惊喜，喺内地举行咗演出，佢亦好感恩大家对佢嘅热情。讲到令自己感到遗憾嘅事时，泳儿话自己冇好好咁“早啲瞓”，因为每到夜深人静嘅时候，灵感就会涌现，比较适合创作……接下来，泳儿会多啲同唔同嘅团队合作，涉足多啲音乐以外嘅技能，例如影视类、短视频等领域，都係佢想多啲尝试嘅新嘢。

 

 

 

　　沈震轩：keep住初心同冲劲

　　沈震轩喺2022年底加入英皇娱乐，参演咗好几部电影之后，重拾“歌手”身份，仲开咗自己的健身工作室。2023年对佢嚟讲，可以话係好充实的一年。喺“湾区发布音乐会”上，沈震轩久违地上台为大家演唱代表作，feel到台下嘅观众focus on佢嘅歌声，佢话感觉非常爽。相比起教导新人大道理，自己更中意从新一代嘅身上学习唔同嘅新嘢。沈震轩仲用自己做例子，因为女朋友年纪比佢细，会成日提醒佢做人chill啲，慢慢咁佢觉得，做人放松翻少少，反而可以更enjoy个舞台。佢仲提醒大家，keep住自己嘅初心好重要，喺行业里面耐咗，留住入行时嘅冲劲，可以令自己更投入工作，更完美地做好成件事。