|
|
|
《UP在湾区之港见粤闻》继续带大家玩转非遗文化！今期，香港艺人沈震轩一大早同Color团队前往惠州，品尝嗰度“醉”诱人嘅特色饮品，仲会玩转最鬼马得意嘅“舞蹈”。会发生咩趣事，大家可以get到边种技能？事不宜迟，擸齐架罉，去片！ 郭玮/文、图 有得食，“醉”开心 虽然係一大早就要出门，沈震轩依然觉得好兴奋，因为“喜爱夜蒲”嘅佢，好少机会神早流流去饮酒！嚟到传承人周氏夫妇嘅酒窖，浓浓酒香十分勾魂，酒埕内嘅糯米酒澄澈醇香，非常醉人。对酒文化甚是喜爱嘅阿沈，忍唔住对制作糯米酒工序嘅好奇，马上向师傅请教。蒸饭、做酒曲、拌曲……原来一缸糯米酒，要经过十几道工序先可以完成。阿沈心喐喐，话想马上落手体验下，周师傅梗係乐意奉陪啦，一边手把手教学，仲一边讲解制酒嘅温度调节、湿度控制等各种注意事项。阿沈跟住师傅搓散热辣辣糯米饭嘅时候，被阵阵米香不停地“诱惑”，令佢谂起自己一早出门都未食早餐，肚仔已经饿到咕咕声。周师傅推荐佢试下用糯米酒煮成嘅“炒鸡酒”。鲜嫩鸡肉经过糯米酒浸煮，变得更嫩滑可口，酒气在烹煮过程中挥发，留下香甜，同鸡肉结合后，齿颊留香，令人回味无穷。据闻“炒鸡酒”补而不燥，男女老少都啱食噶！ 糯米酒 惠州民间用糯米嚟酿酒嘅文化，已经有近千年嘅历史。早在宋代，苏东坡嚟到惠州，老百姓就请佢品尝咗一下用糯米制成嘅酒，佢兴致一起，便写下名句“玉粉轻黄千岁药,雪花浮动万家春”，其中嘅“万家春”係佢为自己亲手酿造嘅酒所取的名字。喺民间，其实仲有“斤酒当九鸡”嘅讲法，糯米酒可以话係客家妇女“坐月子”必备佳品。客家糯米酒传统酿造技艺，已经被列入广东省非物质文化遗产名录。 百厌“麒麟”最鬼马 舞龙舞狮大家都一定睇得好多啦，舞麒麟有冇见过？嚟到惠州，阿沈就话好想见识一下呢种有成几百年历史嘅传统舞蹈。斋睇外表你以为麒麟凶神恶煞，听传承人曾师傅话，其实“麒麟”係中国远古时期嘅一种吉祥神兽嚟噶，佢身上彩绘嘅祥云、龙凤，就係大家对风调雨顺、国泰民安嘅美好祈愿。有功夫底嘅阿沈对麒麟舞好感兴趣，师傅二话不说就话收佢为徒，即刻过翻几招俾佢：虚步加个小跳，一招四门八斗，再到一个七星步……每款招式都有个趣怪嘅学名，而阿沈学得似模似样。体验过趣致嘅麒麟舞之后，阿沈话希望通过自己嘅学习，将呢个咁鬼马嘅传统技艺传承落去，俾更多人认识呢个传统舞蹈。 麒麟舞 小金口麒麟舞，源于传说“沙仙训麒麟”，除咗具有东江本土风情之外，其表演套路诙谐幽默，极具娱乐性与观赏性。据记载，呢种舞蹈喺乾隆年间已经在民间广为流传，逢年过节、婚姻嫁娶、新居落成等喜庆大事嘅时候，都可以睇到麒麟舞助兴。2009年，小金口麒麟舞被列入广东省级非物质文化遗产名录。 Color提示： 《UP在湾区·港见粤闻》会继续带大家学非遗、品美食、玩转非遗手艺噶，如果想知下次係边个带大家搞搞新意思，记得密密关注我哋啦。
