好出片！梁琤爱上“非遗”凉帽

　　天气渐渐升温，太阳都出嚟同大家玩游戏啦，要阻挡紫外线嘅伤害，防晒就好重要啦。搽防晒、担伞只是基本操作，喺深圳嘅大鹏所城，就有一种传统防晒神器，兼顾到时尚与实用，热衷于fashion嘅梁琤老师都赞佢正！

　　郭玮/文、图

 

　　“帽”文化

　　深圳大鹏半岛沿海气候炎热，凉帽就係当地人常年必备嘅劳动保护用品啦。大鹏凉帽係纯手工编制而成嘅，用料同手法都十分讲究，佢嘅制作技艺喺2017年就被列入大鹏新区区级非物质文化遗产名录。佢除咗係一种传统又实用嘅劳保用品之外，仲係当地人心中嘅“吉祥物”，大鹏凉帽嘅历史亦体现出当地婚嫁民俗嘅变迁，非常具有文化底蕴。

 

 

 

 

　　“帽”制作

　　要制作一顶大鹏凉帽，需要准备嘅材料都几繁琐。竹制嘅帽子主体，係由削成薄片的竹篾编成而成嘅，轻巧又结实，仲有隔热降温嘅清凉奇效；帽帘嘅遮阳布，要人手一步步摺出皱褶，因为摺叠过程中冇针线固定，一定要细心耐性，不然就容易摺得唔均匀、影响美观，或者手滑散开，就只能重新再嚟。帽内圈嘅布边要用针线固定，因为竹编嘅边框有一定厚度与硬度，针线穿插过程都需要巧妙用力。有功夫底嘅梁琤老师落手试过，真係需要用力技巧先能够完成。最后，要在帽顶涂上红漆，除咗可以防虫防霉之外，仲寄托住当地人一份吉祥如意嘅祝福。大鹏凉帽同其他地区嘅遮阳帽相比，内圈会更加细，遮光隔热嘅效果更好，更能适应当地嘅气候环境。

 

 

 

 

 

 

　　“帽”造型

　　因为鹏城沿海，平时嘅风都较大，需要用一条绕过下巴嘅绳索嚟固定凉帽，便于日常生活同劳动。大鹏凉帽嘅整体造型固定，但绳索位就会因应唔同嘅需要，有特殊嘅小心思：如果家中有喜事，绳索一般就会用红绳制作，寓意吉祥报喜，如果家中有唔好嘅事情发生，当然就会用白色代替；如果单身男女有心觅如意情人，就会喺绳索上挂上彩球，以示自己嘅求偶心……凉帽制作手艺人刘大姐，特意为大家献唱咗关于凉帽嘅浪漫山歌。时至今日，遮阳用品花多眼乱，大鹏凉帽因为工艺繁琐，人力成本高，产出就越来越少，渐渐就成为鹏城嘅文化名片，每次有人戴起佢哋嘅时候，都会想起帽子下曾经发生过的故事，令人回味。梁琤老师专登买低咗一顶大鹏凉帽，佢话摆造型影靓相嘅时候一定用得着，如果大家需要素材，可以问佢借添。

 

 

 

　　Color提示：《UP在湾区·港见粤闻》会继续带大家学非遗、品美食、玩转非遗手艺。如果想知下次会有边位大咖带大家搞搞新意思，记得关注我哋啦！