扫街啦！阮兆祥粤食粤好味

　　前段时间，“祥师兄”阮兆祥嚟咗广州出trip，好客又多friend嘅可乐君，即刻就安排“味成年阿辉”帮手，带祥师兄去觅食！正所谓食在广州，广州美食咁多，从边度食起好呢？我哋先嚟一次“味蕾马拉松”，去荔湾老城区“扫街”，品味最地道嘅广州味！

　　郭玮/文、图　

 

　　西华路：街坊老味道

　　西华路虽然唔係好长，但主打一个“老店够晒多”，唔少本地街坊都会嚟呢度觅食。腍而不烂嘅焖牛筋，淋喺米香十足嘅猪肠粉上，惹味汁水渗晒入肠粉里面，啖啖都能品尝到腩汁嘅精华；牛三星足料之余，仲要有酸萝卜同韭菜提鲜，吃起身特别香。祥师兄话广州嘅猪肠粉比佢过去食嘅都要厚实够juicy，食到非常满足。行过对面马路，就有每到饭点排晒长龙的冰花煎饺，皮薄馅足嘅韭菜饺同粟米饺係最畅销嘅品种，淀粉打芡，煎到饺子皮金黄酥脆，每一啖咬落都卜卜脆，沾上秘制辣酱，解腻又开胃，难怪大家都争相嚟打卡。最后，再plus一份沙湾奶制甜品收尾，浓而不稠嘅杏仁炒奶，香甜双皮奶又有粉甜红豆增香，西华路嘅美味之旅几prefect！

 

 

 

 

龙津路：日常好滋味

　　龙津路都係老广中意嘅开胃“美食街”。状元及第粥加份咸煎饼做早餐，係老广开启一日新生活嘅首选。新鲜采购嘅猪杂用滚粥烫熟，弹牙鲜甜令人上瘾，内含南乳嘅咸煎饼油香四溢，一个粥水润喉，一个香脆可口，就算大份都好容易食晒。前段时间喺《狂飙》中，冇淋豉油嘅肠粉引发广东人热议，祥师兄去到老字号拉肠店，专登点咗一份斋肠捞豉油，话要好好品尝肠粉嘅米香。竹升面係祥师兄嘅最爱，猪油捞够香，腩汁拌惹味，加广式炸酱更是令人回味无穷，最上头嘅仲係配面嘅虾子大地鱼汤，加入韭黄吊味，无论係浸云吞定係汤面，都可以完美match到。中意讲意头嘅老广，唔单止中意将“捞起”挂在嘴边，仲希望可以食埋落肚。顺德捞鱼皮将爽脆鲮鱼皮同香菜、花生米、白芝麻等香料均匀捞起，啖啖落口都齿颊留香，鱼皮爽身唔油腻，冰凉口感最啱大餐之后消下腻。

 

 

 

　　最爱人情味

　　祥师兄话自己好耐冇嚟广州玩，最挂住嘅就係呢度众多美食。食咗一日，佢觉得非常满足，而最开心嘅，就係睇到广州嘅烟火味，感受到街坊的热情。每次到一个新城市，祥师兄都中意去试下过当地市井的生活，食最贴地嘅街头小吃，行最多居民的老街小巷，甚至係坐喺公交车站hea时间，呢啲生活体验都令佢受益匪浅。遇到路过嘅行人，祥师兄会热情打招呼，偶尔有人要求握手合影，佢都会亲切配合，睇嚟佢係将自己feel嘅人情味，大方回馈翻俾大家。