港饮食 三餐四季食不停

　　港式饮食同广东口味好贴近，但又有佢自己独有嘅味道，一日三餐都会融入唔同国家、地区嘅美食元素，遍地嘅茶餐厅、贴地街头小食，简单得嚟又会带啲惊喜俾你，令你忍唔住一路行，一路放开肚皮食。

　　

　　郭玮/文 何崇仪/图

 

　　

　　常餐：混搭好玩

　　

　　大湾区嘅朋友，去到边都离唔开粥粉面饭，一日三餐冇淀粉落肚，等于冇食过正餐。如果早餐实在起唔到身，食个brunch就最啱啦。港式茶餐厅啱晒你心水，一份常餐就会搭配好早、午餐嘅全部食物：醒神饮品有热有冻，热斋啡冻柠茶任君选择；奶油猪搭火腿蛋、菠萝油就配奄列、牛油多仲俾多块香煎鸡扒；主食拣茄牛通粉或者牛肚河粉就啱啱好了，食完一份够饱又唔会滞，开启一日活力满满嘅工作。茶餐厅嘅餐单唔够新鲜？咁你一定要试试五花八门嘅路边摊，店家好多时会将唔同嘅元素大混搭。例如咖喱、冬阴功等汤底同传统竹升面搭档，不变的係依然落葱花，食嘅时候可以根据自己的口味，加啲红醋或者滴两滴辣椒油，简单快捷又绝对俾到你惊喜。

 

 

 

 

　　

　　小食：丰富爆肚

　　

　　唔好睇小小食，试多几样，一样好饱肚噶！港式西多士烤到外脆内热，留边就香脆啲，飞边就可以enjoy面包嘅松软，花生酱擦满多士嘅每寸肌肤，加上香甜柔滑嘅炼奶，香脆软甜嘅口感有晒，虽然热量高，但啖啖都好满足。鱼肉整嘅烧卖，真係几少见噶，咬落弹牙又香口，食一份就足够做餐下午茶啦。蒸制的小食里面，后生仔女最中意糯米糍，外形肥肥白白，软糯香甜，一咬开有爆浆嘅感觉，口味仲好丰富，经典嘅豆沙馅、当季嘅水果夹心，芒果酸酸甜甜，榴莲会食到停唔到口，个胃一下就填满了！如果你仲係心思思想食重口味嘅，香炸臭豆腐就啱晒河车啦。食到饱饱滞滞，都係要饮翻杯冻饮……用一个下午嚟食，时间都係唔够。

 

 

 

 

 

　　

　　人情味：热情贴地

　　

　　香港街头，人们步履匆匆，生活节奏依然好快。通关之后，嚟香港嘅内地游客多咗，就算普通话讲得唔够流利，香港嘅商家们都会用热情搭够，同你介绍菜品，帮手指路，欢迎大家参观佢哋嘅家园、试食佢哋嘅美食。呢度嘅商家最识抓住商机同宣传机会，食肆嘅阿姨一见到我哋录音影相，即刻煮一碗新鲜热辣嘅面俾我哋影，满面笑容又几啱上镜啵。牛肉店外的伯伯已经係游客镜头里的常客，佢中意一边切牛肉，一边同客人倾计，讲完自己店嘅招牌菜，就会同你介绍最近香港有咩新嘢玩，十足一部行走嘅旅游指南。