Twins教你打"孖"上

　　正如字形，“孖”係相连、成对的意思，亦指双生子。“真·twins” 1n1 Sisters平时出双入对，着一样嘅衫、唱同一首歌，仲有相似嘅兴趣爱好添，可以话凡事都打孖上。今期粤语课题，孖女孖实Color君，睇睇喺粤语里面有咩可以打“孖”上嘅。

　　郭玮/文  秦丽莹/图

　　1n1 Sisters、郭玮/模特

 

　　孖铺 maa1 pou1

　　喺粤语解释里面，“铺”除咗店铺之外，仲可以指瞓觉用嘅床具，例如“被铺”就係被褥枕头同床垫嘅组合。“孖铺”意思为两个人以上瞓喺同一张床上，特指平时唔一起瞓嘅人。

　　造句：玩到咁夜啦就唔好走啦，今晚就同我孖铺啦。

 

　　

　　孖生 maa1 saang1　　

　　“孖仔”“孖女”即係孪生兄弟、姊妹，孖就是孪生嘅意思。明代谢肇淛著嘅《五杂俎·人部一》写道：“孖生者疑於兄弟。或云：‘后生者为兄，以其居上也。’”通常我哋会将双胞胎中，先出娘胎嘅称为“大孖”，后出娘胎嘅称为“细孖”。

　　造句：两姊妹虽然係孖生嘅，但两个人性格都好唔同，细孖比较活泼，大孖相对文静一啲。

 

　　孖毡 maa1 jin1

　　呢个词係英文“merchant”嘅粤语音译，意为商人、批发商。广东以前会叫与外国商人贸易嘅经纪人为“孖毡”，而呢个写法最早就出现喺清代林则徐嘅《密挐汉奸札稿》中：“所有包买之窑口，说好之孖毡，与兴贩各路之奸商，护送快艇之头目……现俱开出姓名。”

　　造句：呢个孖毡食水好深，同佢做生意都难赚钱啦。

 

　　孖公仔 maa1 gung1 dzai2

　　“公仔”原本就有小人儿嘅意思，经过演变，佢就被泛指玩偶、木偶、图画人像等。孖公仔，原意係指粘连喺一起嘅两个人形泥公仔，依家借此嚟形容两个人关系亲密无间、出双入对，包括形影不离嘅好朋友、热恋中嘅男女朋友、感情好的夫妻。

　　造句：佢哋两个真係超sweet，日日都孖公仔咁一起上落班。

 

　　

　　孖辫妹 maa1 bin2 mui3

　　喺粤语中，妹一般指年纪比较细嘅女孩子，亦常用于形容比较活跃、有个性的女仔，例如“辣妹”“MK妹”等等。孖辫妹指扎住两条辫子嘅女仔 ，这种发型喺视觉上俾人可爱、活泼的感觉。

　　造句：孖辫妹中意唱唱跳跳，有佢哋在场，派对气氛都活跃好多。

 

　　炒孖展 caau2 maa1 zin2

　　“孖展”一词来自香港，係margin嘅音译，即係保证金嘅意思。喺香港市场上，银行同证券公司会向投资者提供融资服务，投资者可以利用融资额进行杠杆投资，炒孖展可以理解成高风险嘅投资方式。

　　造句：炒孖展风险好高，嗰个人就係因为炒㶶孖展，依家一无所有。